Xarakada Al-Shabaab ayaa sheegatay Mas’uuliyada weerar is qarxin ahaa oo maanta barqadii ka dhacay magaalada Beledweyn ee Gobolka Hiiraan.

Sarkaal u hadlay Al-shabaab ayaa sheegay in weerarka ismiidaaminta ay la eegteen Ciidamo wada jir ahaa oo isugu jira Itoobiyaan, Jabuutiyaan iyo Ciidamada dowladda.

Sarkaalka oo la hadlay Idaacada Al-Andulus oo ku hadasha Afka Al-Shabaab ayaa sheegay in mid ka mid ah ciidankooda oo Istish-haadi ahaa uu howl galka fuliyay, kuna dilay ilaa 20-meeyo askar iyo saraakiil isugu jirtay.

“Camaliyad istish-haadi ah oo uu fuliyay walaal mujaahidiinta ka tirsan ayaa Bariga B/weyne lagula eegtay cadawga oo wadajira waxaan muslimiintu u sheegaynaa in 13 askari Itoobiyaan ah ka mid yihiin cadawga ku hoobtay weerarkii maanta waxaa kale oo khasaara xoogan gaaray maleeshiyaadka Jabuutiyaanka”ayuu yiri Sarkaal u hadlay Al-Shabaab oo la hadlay Idaacada Andulus.

Qasaaraha ka dhashay qaraxan ayaa wali isa soo taraya, iyadoo dadka ku dhaawacmay ay gaarayaan ilaa 33-ruux, kuwaasoo la dhigay Isbitaalka Beledweyn oo xilligan laga soo sheegayo daawo la’aan.

Comments

comments