Bartamaha (Muqdisho):- Ra’iisal Wasaaraha Xukuumada Federaalka KMG ah ee Soomaaliyeed Mudane Maxamed Cabdullaahi Maxamed (Farmaajo) ayaa maanta qado u sameeyey saraakiisha ciidamada Xoogga dalka Soomaaliyeed.

Ra’iisal Wasaaraha oo qadada kadib la hadlay saraakiisha ciidamada ayaa uga mahadceliyay adkeysiga iyo dedaalada xoogan ee ay ugu jiraan sidii dib loogu soo celin lahaa dalka Nabadii iyo kala dambeyntii isagoo u sheegay in dal aan laheyn ciidamo aanu jiri karin sidaasi owgeedna looga baahan yahay saraakiishu inay la yimaadaan dardar xoogan oo ay ku nidaaminayaan ciidamadooda isla markaana dalka uga saarayaan caddowga.

Saraakiisha ciidamada ayaa iyaguna uga mahadceliyay Ra’iisal Wasaaraha casuumaadan ballaaran oo qadada ah waxayna warbixino xasaasi ah ka siiyeen howlgaladooda iyo ciidamada ay hogaamiyaan, iyagoo taakulo dhan kasta ah ka codsaday Ra’iisal Wasaaraha iyo xukuumadiisa cusub.

Abaanduulaha ciidamada Xoogga Dalka C/kariin Yuusuf Aadan (Dhega-badan) ayaa si guud uga warbixiyay ciidamada iyo howlgaladoodii isagoo sheegay in maalmihii ugu dambeeyey dagaaladii dhacayay ay ku  naafeeyeen caddowga wuxuuna ugu baaqay dhalinyarada u dagaalamaya kooxaha mucaaridku inay dagaalada joojiyaan hubkana iska dhigaan.

Ugu dambeyntiina Ra’iisal Wasaare Maamed Cabdullaahi Maxamed Farmaajo oo shirka soo gabo gabeeyey ayaa u balan qaaday in xukuumadiisu ay la garab istaagi doonto taakulo dhaqaale iyo mid Milateriba ayna uga fadhiyaan ciidamada Xooga dalka Soomaaliyeed inay gutaan waajibkooda Qaran ee ka saaran badbaadinta dalka iyo dadka.

Kulankan ayaa qeyb ka ah dedaalo uu ku doonayo Ra’iisal Wasaaraha Xukuumada Federaalka KMG ah ee Soomaaliya Mudane Maxamed Cabdullaahi Maxamed (Farmaajo) inuu dib ugu dhiso ciidankii Xooga Dalka Soomaaliyeed si loo helo Nidaam iyo kala dambeyn.

Xafiiska Warfaafinta

Comments

comments