Gudoomiyaha Xisbiga Mucaaradka ee UCID Eng, Feysal Cali Waraabe ayaa wal wal ka muujiyay nabadgelyada iyo jiritaanka Somaliland, isagoo ku eedeeyay Madaxweynaha Somaliland Axmed Siilaanyo in aanu talada gacanta ugu jirin.

Eng. Feysal Cali Waraabe ayaa sheegay in dad aan la soo dooran ay talada maamulka gacanta ugu jiraan, taasoo uu tilmaamay inay keentay in musuq maasuqi uu sii baaho, dimoqraadiyadii ay mugsi sii gasho.

“Waxaan wal wal ka qabaa jiritaanka Somaliland iyo nabadgelyadeeda, in Madaxweynaha aanu talada gacanta ugu jirin oo dad aan la soo dooran ay meesha hayaan, runtii Siilaanyo waa siyaasi rug cadaa aha, ma aqaan meesha ay wax ka qaldan yihiin”ayuu yiri Feysal Cali Waraabe.

Feysal Cali Waraabe ayaa inta badan naqdiya siyaasada Maamulka Somaliland, isagoo Madaxtooyada iyo Wasiirada uu si kulul uga weeraro qalabka Warbaahinta, waxaana inta badan hadaladiisa ay yihiin kuwo aanu la ganban.

Maamulka Somaliland ayaa muddo 20-sano raadinaya aqoonsi, tan iyo markii 1991-dii ay ku dhawaaqeen inay yihiin dal ka go’ay Soomaali inteeda kale, inkastoo wali wada hadalo ay u socdaan iyaga iyo dowladda Soomaaliya.

Comments

comments